މާފަރުސްކޫލްގެ ޕްރިންސިޕްލް އަނެއްކާވެސް ބަދަލުކުރައްވައިފިކަމަށް ލަންދޫއިންފޯއަށް މާފަރުސްކޫލުން މަޢުލޫމާތު ދެއްވައިފިއެވެ. ށ.ކޮމަންޑޫ ހީރާ އަލްފާޟިލް ޢަބުދުލް ޙަންނާން އިދުރީސް ނ.މާފަރު ސްކޫލާއި ޙަވާލުވެލައްވައިގެން މާފަރަށް ވަޑައިގަތީ މިދިޔަމަހުގެ 31 ވަނަދުވަހުގައި ކަމަށް ވެސް މާފަރުސްކޫލުން އެސްކޫލްގެ ސްޕަވައިޒަރ އަލްފާޟިލް ޙަސަން އިބްރާހީމް ލަންދޫ އިންފޯއަށް މަޢުލޫމާތު ދެއްވިއެވެ.
މިފަހަރު ޕްރިންސިޕަލް މިހާއަވަހަށް ބަދަލުވަނީ ކީއްވެތޯ ދެންނެވުމުން މާފަރުސްކޫލް މިވަގުތު ހިންގުމާއި ޙަވާލުވެހުންނެވި ސްޕަވައިޒަރ ޙަސަން ވިދާޅުވީ ޕްރިންސިޕްލްގެ އެކޮމަޑޭޝަން ދެވޭވަރުގެ ފެންވަރު ރަނގަޅުގެއެއް މާފަރުން ލިބެންނެތިގެން ކަމަށެވެ. އެބޭފުޅާ އިތުރަށް ސާފުކޮށްދެއްވަމުން ވިދާޅުވިގޮތުގައި އެފެންވަރުގެ 2 ގެއެއްވަރު މާފަރުގައި އެބަހުއްޓެވެ. ނަމަވެސް އެގޭގޭގެ ވެރިން ކުއްޔަށް އެގޭގެ ދޫކޮށްލަންބޭނުން ނުވަނީ ކަމަށް ވެސް އެބޭފުޅާ ވިދާޅުވިއެވެ. ޕްރިންސިޕަލް ބަދަލުކުރެއްވީ ރ.އިގުރައިދޫ ސްކޫލަށް ކަމަށް މަޢުލޫމާތުލިބެއެވެ.
2007 ވަނައަހަރުގެ ބޮޑުބައެއްގައި މާފަރުސްކޫލް ހިންގެވީ ސްޕަވައިޒަރ އަލްފާޟިލް ޢަބުދުއްސައްތާރު ޢަލީ އެވެ. 2007 ވަނައަހަރުނިމެން އުޅެނިކޮށް އެސްކޫލްހިންގެވުން ޙަވާލުކުރެއްވީ މާފަރު ނާދީ އަލްފާޟިލް ޢަބުދުލްޙަމީދު ޢަބުދުއްރަޙްމާނު އާއި އެވެ. އެކްޓިން އެސިސްޓެންޓް ޕްރިންސިޕަލެއްގެ މަޤާމްގައި ހުންނަވައިގެން ގާތްގަނޑަކަށް 2008 ގެ ޖޫން މަހާހިސާބަށް މާފަރުސްކޫލް ހިންގުމުގައި ހުންނެވުމަށް ފަހު އެބޭފުޅާވެސް ވިލާފައުންޑޭޝަނުން ހިންގަވާ ޑިގްރީލެވެލްގެ ކޯހަކަށް ވަނީ މާލެވަޑައިގެންފައެވެ.
ކޮންމެއަކަސް މާފަރު ސްކޫލްގެ ހިންގުމުގެ ދާއިރާ ހަރުދަނާ ކުރުމުގެ ގޮތުންނާއި ދަރިވަރުންގެ ތަޢުލީމީ ފެންވަރު މަތިކުރުމަށް ނިހާޔަތަށް ބޭނުންވެފައިވާ މިދަނޑިވަޅުގައި އިސްވެރިންގެ ގޮތުގައި ވަޑައިގަންނަވާ ބޭފުޅުން ހަރުނުލާ ކަމީ މިއަދު މާފަރު ސްކޫލްގެ ބެލެނިވެރިންނާއި، މުވައްޒަފުން ، އަދި މިނިސްޓްރީ އޮފް އެޑިޔުކޭޝަނުން ވިސްނާލައްވަން ޖެހޭވަރުގެ ބޮޑުމައްސަލައެއް ކަމުގައި ލަންދޫއިންފޯއިން ދެކެމެވެ.