ލިޔުނީ : މޫސާ ހުސެއިން
Email: moosa.goma@yahoo.com

މިދިޔަ ހަފްތާގެ ބުރާސްފަތި ދުވަހު 12:30 އެހާކަށް ހާއިރު އަޅުގަނޑަށް ލިބުނީ ފޯން ކޯލެކެވެ. ނުވެސް ދަންނަ ނަމްބަރަކުން އައި ކޯލެއްކަމުން ދެފިކުރެއްގައި އިނދެ ފޯނު ނަގައިފީމެވެ. ހަމަ ނެގުމާއި އެކު ވަރަށް ހަޑިހުތުރު ބަހުން އަޅުގަނޑާއި މުޚާތަބުކޮށް ވާހަކަދައްކަމުން ރަށުގެ ކަތީބުކަމަށް މިހާރު ނ.މާޅެންދޫ ކަތީބުކަމުގައި ހުންނެވި މިރަށުގެ ކުރީގެ ކަތީބު އަލްއަޚް ހަސަން ނަސީރު އިބްރާހިމް ހަމަޖެހުނު ވާހަކަ އެމީހަކު ބުންޏެވެ. އެހެން ބުނުމަށް ފަހު އެމީހަކު ފޯނުބޭއްވިއެވެ.
އަޅުގަނޑަށް ލިބުނީ ކުއްލި ހައިރާންކަމެކެވެ. އެހެނީ މީގެކުރިން ދުވަހަކުވެސް މީހަކު އެބީދައިން އަޅުގަނޑާއި މުޚާތަބުކޮށް މުޢާމަލާތު ކޮށްފައިނުވާތީއެވެ. އެކަމަކު އެފޯނުކޯލުން އަޅުގަނޑަށް އެއްކަމެއް އެނގުނެވެ. އެއީ އަޅުގަނޑަށް ނޭނގިވެސް އަޅުގަނޑާއި މެދު ނުރަނގަޅު ގޯސް ހިޔާލްތަކެއް ގެންގުޅޭ ފަރާތްތަކެއް ވާކަމެވެ.
ލަންދޫގެ ކަތީބުކަމަށް މީހަކު ހަމަޖެއްސުމާއި ހަމަނުޖެއްސުން އެއީ އަޅުގަނޑަށް ކުރެވޭނެ ކަމެއްތޯއެވެ! ކަތީބުކަމުގައި މީހަކު ހުއްޓައި އެމީހަކު ކަތީބުކަމުން ދުރުކުރުމަކީ އަޅުގަނޑަށް ކުރެވިދާނެކަމެއް ތޯއެވެ؟
ކުޑަވެސް ޝައްކެއްނެތެވެ. އަޅުގަނޑަކަށް ނުވާނެއެވެ. ނުވެސް ކުރެވޭނެއެވެ. އެހެނީ އަޅުގަނޑަކީ މިއަށްވުރެ މާނިކަމެތި ދެރަމީހަކަށް ވާކަމެވެ. އަދި ދުވަހަކު ކޮޅުންވެސް މިފަދަ ކަމެއް ކުރުމުގައި ޢަމަލީގޮތުން އަޅުގަނޑު ބައިވެރި ނުވާނެތީއެވެ.


ރަށުގެ ރައްޔިތުންގެ ތެރެއިން ވަރަށްގިނަ އަދަދެއްގެ ބަޔަކު ނިކުމެ އަޅުގަނޑުމެންގެ ކުރީގެ ކަތީބާއި ދިމާލަށް ނުރުހުމުގެ ބަސްތައް، އެބޭފުޅާގެ އަނިޔާވެރިކަމުގެ ވާހަކަތައް އަމާޒްކުރެވުނު ދުވަހުވެސް އަޅުގަނޑު ހުރީ އަޅުގަނޑުގެ ގޮތުގައެވެ. ވީއިރު ފޯނުކޮށްފައި ކާކު ނޭނގޭގޮތައް އަޅުގަނޑާއި ދިމާލަށް އެފަދަ އިބާރާތެއް ބޭނުންކުރެވުމުގެ ފުރުޞަތެއް އެބައޮތްބާވައެވެ.
އަޅުގަނޑަށް މިހާރު ވިސްނޭގޮތުގައި މިއަދު ރަށުތެރެއަށް އައިސްފައިމިވާ ނުތަނަވަސްކަމާއި ހާސްކަމަކީ މިދެންނެވިކަހަލަ ، ރަނގަޅަށް ކަންތައްތައް ބަލައިނުލައި، މީހުންނާއި ދިމާލަށް ހިތުހުރި އެއްޗެހިތަކެއް ގޮވަމުންދާ މީހުންގެ ސަބަބުން އައިސްފައިވާ ނުތަނަވަސް ކަމެކެވެ. އަދި އަޅުގަނޑު މިއަދު ވަރަށްކެރިހުރެ ބުނަންބޭނުންވަނީ ލަންދޫގެ ހާލަތު ގޯހުންގޯހަށް އަނެއްކާވެސް ވެއްޓެމުންމިދަނީ ރަށުގެ މަސްލަހަތައް އަދި ރަށުގެ ގިނަ ރައްޔިތުންގެ ރަޢުޔަށް ބެލުމެއްނެތި މަދުބައެއްގެ އަމިއްލަ މަޤްސަދުތަކެއް ހާސިލްކުރުމަށްޓަކައިކުރަމުންދާ މިފަދަ ތާކުންތާކު ނުޖެހޭ ކަންތައްތަކުގެ ސަބަބުންނެވެ.
އަޅުގަނޑަށް ވިސްނޭގޮތުގައި ލަންދޫގެ ކުރީގެ ކަތީބު އަލްއަޙް ހަސަން ނަޞީރު އިބުރާހިމްވެސް ލަންދޫގައި ވެރިކަން ކުރައްވަން ބޭޅުންފުޅުވެލައްވާނަމަ ، ރަށުގެ ރައްޔިތުންގެ ރުޙްމާއި ، ސަޕޯރޓް ހޯއްދަވާށެވެ. ސަރުކާރުން ވަޒީފާދެއްވިނަމަވެސް ތިމާ ބަލައިގަތުމާއި، ބަލައި ނުގަތުން އޮންނާނީ ރަށުގެ ލޮބުވެތި ރައްޔިތުންގެ އަތްމަތީގައިކަން ވިސްނަވާށެވެ. ލަންދޫގެ 90 އިންސައްތައެއްހާމީހުން ރަތްފޮތި އައްސައިގެން ނިކުމެ ފާޅުކުރެއްވި ޝުޢޫރުތަކާއިމެދު ވިސްނަވައި މާޒީވެ ދިޔަ ތަނުން ޢިބުރަތް ޙާޞިލް ކުރައްވާށެވެ. އޭރުން ވެރިކަމަށް ވަޑައިގެންނެވުމަށް ރައްޔިތުންގެ ފަރާތުން ޕެޓިޝަނެއް ބޭނުމެއް ނުވާނެއެވެ. އަދި މިނިސްޓަރަކު ރަށަށް ވަޑައިގަންނަވާއިރަށް ތިމާއާއި މެދު ހިތްހަމަ ނުޖެހުން ފާޅުކުރަންދާނެ ބަޔަކުވެސް ނުތިބޭނެއެވެ. މިއީ އަޅުގަނޑުގެ ޚިޔާލެވެ. އަދި އަޅުގަނޑު ދެކޭ ގޮތެވެ.