ޚަބަރު: އަޙްމަދު ދާއޫދު

މިމަހުގެ 7 ވަނަދުވަހުގެ ރޭ 8:30 ގައި ލަންދޫ ޔޫތުއެންކަރޭޖިން ސޮސައިޓީގެ ހިންގާކޮމިޓީގެ މިދައުރުގެ 8 ވަނަ ބައްދަލުވުން އެޖަމްޢިއްޔާގެ އިދާރާ ނ.ލަންދޫ ބުލޫކިޔާގޭގައި ބޭއްވިއްޖެއެވެ. މި ބައްދަލުވުން ފެށުމުގެ ގޮތުން ވާހަކަދެއްކެވީ ޖަމްއިއްޔާގެ ރައީސް އަލްފާޟިލް މުހަންމަދު އިބްރާހީމެވެ. ރައީސްގެ ވާހަކައިގައި މި ބައްދަލުވުމުގެ އެންމެ ބޮޑު އެއް މަޤްޞަދަކީ ބައްދަލުވުންތައް ނުބޭއްވި ގިނަދުވަސްތެކެއްވަމުން ދާތީވެ އާއި އަދި މަޝްވަރާ ކޮށްލަންޖެހޭ ބައެއްވާހަކަތަށް ހުރުމުންކަމުގައި ފާހަގަ ކުރެއްވިއެވެ. އެގޮތުން ޖަމްޢިއްޔާގެ އިދާރާއެއް ވަކިން ޢިމާރާތެއްގައި ހިންގުމަށް ޓަކައި ޢިމާރާތެއް އެޅުމަށް ބިމެއް ހޯދުމާއި ބެހޭ ގޮތުން ނާއި މާލިއްޔަތު މުއްސަދި ކުރުމާއި ބެހޭގޮތުން ނާއި ބެންކުއެކައުންޓެއްގެ ކަންތައްތައް ވަރަށް އަވަހަށް ހަމަޖެއްސަން ވެއްޖެކަމަން އެބޭފުޅާ ވިދާޅުވިއެވެ. އަދި މިހާރު ހުސްވެފައިވާ މަޤާމްތަކަށް އިތުރު މީހުން ހޮވުމާއި ބެހޭ ގޮތުން ވެސް މިބައްދަލުވުމުގައި އެބޭފުޅާވާހކަދެއްކެވިއެވެ.

މިހާރު މިކަންތައްތައް އޮތް ހިސާބެއްސާފުކޮށްދެއްވަމުން މިޖަމްޢިއްޔާގެ ރައީސް ލަންދޫސްކޫލްގެ ޕްރައިމަރީޓީޗަރ ނ.ލަންދޫ ކެރެޓް އަލްފާޟިލް މުޙައްމަދު އިބްރާހީމް އެބައްދަލުވުމުގައި ވިދާޅުވީ ބިމެއް ހޯދުމަށް ރަށުއޮފީހަށް ލީސިޓީގެ ޖަވާބު ލިބިފައިވާކަމަށާއި ޖަވާބުގައި ވަނީ ފުޓުބޯޅަދަނޑު ހެދުމަށް އަދި ވަކި ސަރަހައްދެއް ކަޑަ ނޭޅޭތީ ފުޓުބޯޅަދަޑެއް ލިބުނީމަ ބިމެއް ލިބޭނެކަމަށެވެ.
މިކަމާ ބެހޭ ގޮތުން މެމްބަރުންގެ މެދުގައި ކުރެވުނު ހޫނުގަދަ މަޝްވަރާއިން ނިމުނީ ދަޑު ހަދަންދެކަށް ތިބެން ނުފެންނަކަމަށާއި ކޮންމެ ސަރަހައްދަކުންވިޔަސް ބިމެއް ހޯދުމަށް އަލުން ސިޓީއެއް ލުމަށެވެ.

ޖަމްޢިއްޔާގެ މާލިއްޔަތު މުއްސަދި ކުރުމަށް މިހާރު އެކި ކަންކަމަށް ޕުރޮޕޯޒަލްތައް ހަދާ ހުށައެޅިފައިވާނޭކަން ރައީސްފާހަގަ ކުރެއްވިއެވެ.

މިބައްދަލުވުމގައި އިތުރަށް އެނގިގެންދިޔައީ ޖަމްޢިއްޔާގެ ފޯކަލް ޕޮއިންޓަކަށް ހުސެއިން ޖަވާދު ހަމަޖެހިފައިވާ ކަމަށާއި އަދި މީގެ އިތުރުން ހުސެވެފައިވާ މަގާމްތަކަށް މީހުން ހަމަޖެއްސުމަށް އެފަރާތްތަކާއެކު ބައްދަލުވުމެއްބޭއްވުމަށް ފަހު ހުސްވެފައިވާ މަގާމްތަކަށް މީހުން ނެގުމަށް ހުރިހާ މެމެބަރުންވެސް އިއްތިފާޤުވާކަމެވެ.

ހިންގާކޮމިޓީގެ މެމްބަރުން ގެތެރެއިން ޖަމްޢިއްޔާގެ ނައިބުރައީސް އަލްފާޟިލް ސަލީމް ޙުސެއިން ފިޔަވާ ހުރިހާބޭފުޅުންވެސް މިބައްދަލުވުމަށް ޙާޟިރުވެފައިވާކަން ލަންދޫއިންފޯއަށް މަޢުލޫމާތު ލިބިފައިވެއެވެ.