ލިޔުނީ ހަފްސީ ޢަބްދުﷲ، ނ. ލަންދޫ


މިދިޔަ ޖުލައިމަހުގެ ތިރީސްވީ ބުދަ ދުވަހުގެ މެންދުރު ދެގަޑި ފަންސާސް ތިންމިނިޓްގައި އަޅުގަނޑު ފޯނުބަލާލީ މެސެޖެއް އައިސްގެންނެވެ. ރަށުގެ ޒުވާނެއްގެ ފަރާތުން އައި މެސެޖެއްކަމުން އަޅުގަޑު ހިތަށްއެރީ ކޮންމެސް މީހަކަށް ޖޯކެއް ޖަހަނީކަމަށެވެ. ނުވަތަ މީހަކާ ދިމާކޮށްލަނީ ކަމަށެވެ. އެހެނީ ޢާންމުކޮށް ރަށުގެ ޒުވާނުންގެ ފަރާތުން އަޅުގަނޑަށް ލިބެނީ މިފަދަ މެސެޖް ތަކެވެ. އެހެންކަމުން މިފަހަރު ކޮންކަމަކަށް، ކާކަށް ޖޯކް ޖެހީބާއޭ ހިތަށް އަރާ މެސެޖް ބަލާލީމެވެ. މެސެޖްގައި އޮތީ ހަޤީޤަތުގައިވެސް ޖޯކެކެވެ. އެކަމަކު މިފަހަރު ޖޯކް އަމާޒުވަނީ ވަކި މީހަކަށް ނޫނެވެ. ލަންދޫގެ މުޅި ރަސްޔިތުންނަށެވެ. އާދެ! މެސެޖްގައިވަނީ ކޮން އިބާރާތެއްކަމަށްތޯއެވެ؟ މެސެޖްގައިވަނީ ލަންދޫޫ އިންފޯ ޯކިޔާ ބްލޮގަކަށް ވަދެލުމުގެ ދައުވަތެވެ. ހަޤީޤަތުގައިވެސް އެކަންވީ އަޅުގަނޑަށް ވަރަށްބޮޑު ޖޯކަކަށެވެ. އެހެނީ މިވީހާތަނަށް ލަންދޫުން މިފަދަ ކަމަކަށް ޝައުޤުވެރިވެގެން އުޅުނު މީހަކު އަޅުގަނޑު ނުދެކެމެވެ. އެފަދަ ދުވަހެއް އައިސްފާނެކަމަކަށްވެސް އުއްމީދެއް ނުކުރަމެވެ. އެހެނީ ލަންދޫގެ ޒުވާނުންނާ ރައްޔިތުންވެސް އަޅުގަނޑަށް ފާހަގަކުރެވެނީ ފުޓްބޯޅައިގެ ބައެއްގެ ގޮތުގައެވެ. އެހެންކަމުން އެމެސެޖަށް އަޅުގަނޑު މާބޮޑު ސަމާލުކަމެއް ނުދެމެވެ.
ނަމަވެސް އެމެސެޖުު ލިބުނުތާ ދެތިން ދުވަސް ފަހުން އަޅުގަނޑަށް ކޮންމެވެސް ވަރަކަށް އެމެސެޖާމެދު ވިސްނާލެވުނެވެ. އެފަދަކަމަކަށް ޝައުޤުވެރިވާނެ ޒުވާނުންތަކެއް ލަންދޫގެ ފަސްގަނޑުން ފެންނާނެނަމައޭ ހިތަށްއެރިއެވެ. އެހެނީ ލަންދޫ ލަންދޫއަކަށް ހެދުމަށް އެކަމުގެ މުޙިންމުކަން އަޅުގަނޑަށް ވިސްނޭތީއެވެ. ޖޯކަކަށްވިޔަސް އަޅުގަނޑަށް ލިބުނު މެސެޖްގައިވާ އެޑްރެހަށް ވަދެލީމެވެ. ލިބުނީ އުފާވެރިކަމާއި، ސިހުމާއި ހައިރާންކަމެވެ. ކޮންމެއަކަސް މިފުރުޞަތުގައި ލަންދޫގެ ޚަބަރުތައް މުޅިދުނިޔެއަށް ފަތުރާލުމަށް އިސްނެގި ހުރިހާ ފަރާތްތަކަށް ލަންދުއަށް އުފަން ލަންދުއަށް ހެޔޮއެދޭ މީހެއްގެ ހައިޔިއްޞަތުން ހިފެހެއްޓުމެއް ނެތި ޝުކުރު އަދާކުރަމެވެ. ލަންދޫ ލަންދުއަކަށް ހެދުމުގެ ޒިންމާއާ ހަވާލުވެ، އެމަސައްކަތް ކުރިއަށްގެންދާ ލަންދޫގެ ޒުވާނުންނަށް ސާބަސް ރައްދުކުރަމެވެ.
މިއަދު އަޅުގަނޑު މިލިޔާ ކުޑަ ލިޔުންކޮޅަކީ ދެހާސް ދެވަނަ އަހަރު ލިޔުންތެރިކަމާ ނޫސްވެރިކަމަށް އަޅުގަނޑު ވަނީއްސުރެ، މިހާތަނަށް ލިޔާ އެންމެ ޝަރަފްވެރި، ފަޙްރުވެރި، އެންމެ ބޮޑު ހިތްހަމަޖެހުމެއް ލިބިގެންދާ ލިއުމެވެ. މިލިއުމުގެ އޮއްޓަރެއް ނެތްނަމަވެސް، އަޅުގަނޑުގެ ރަށުގެ ޚަބަރާއި މައުލޫމާތު ހިމެނޭ ބޮލޮގަށް ލިއުމަކީ އަޅުގަނޑަށް ލިބޭ ވަރަށްބޮޑު އުފަލެކެވެ. އަޅުގަނޑު ނޫސްވެރިކަމާ ލިޔުންތެރިކަމުގެ މިހޭދަކުރާ ހަވަނަ އަހަރުގެ ތަޖުރިބާގެ އަލީގައި ދެތިންކަމެއް ފާހަގަކޮށްލަން މިފުރުޞަތުގެ ބޭނުން ހިފަމެވެ. މިއަދުގެ ރާއްޖެއަކީ ތެދު ކަށަވަރުކުރާ ރާއްޖެއެކެވެ. ތެދާހަމައަށް ވާޞިލްވާ ރައްޔިތެއް ދިރިއުޅެމުންދާ ޤައުމެކެވެ. އެހެންކަމުން ފުރަތަމަ ކަމަކީ ތެދު މައުލޫމާތު ޒިންމާދާރުގޮތެއްގައި ފޯރުވައިދިނުމެވެ. ދެވަނަކަމަކީ ތިމާއަށް މުޙިންމު ވާހަކައިގެ ބަދަލުގައި އެންމެންނަށް މުޙިންމު ވާހަކަ މުޙިންމުގޮތަށް ލިއުމެވެ. މިބްލޮގްގައި ރަށުގެ ރައްޔިތުންނަށް މުޙިންމު ވާހަކައަށް އިސްކަން ދިން ނަމަވެސް، އެހެން މީހުންވެސް މިބްލޮގަށް ވަންނާނެކަން ޤަބޫލުކުރަންޖެހެއެވެ. އެހެންކަމުން ބޯފެންވަޅުގެއަށް ދޮންވެލިލުން ކަހަލަ ޖޯކް ވާހަކަތައް ލިއުމަކީ ޖޯކެއްކަމަށް އަޅުގަނޑަށް ސިފަވެއެވެ. ބްލޮގަކީ، މައުލޫމާތު ފެތުރުމަކީ، ޖޯކެއް ނޫނެވެ. ފުރަތަމަ މެސެޖް ލިބުމުން އަޅުގަނޑަށް އެކަން ޖޯކަކަށް ހީވިނަމަވެސް މެއެވެ.
މިވީ ކުޑަދުވަސްކޮޅުގެ ތެރޭގައި މިބްލޮގުން އަޅުގަނޑަށް ލިބުނު އެންމެ ބޮޑު ހިތްހަމަޖެހުމަކީ ރަށުގެ ތަފާތު މައުލޫމާތުތައް ލިބެމުންދިއުމެވެ. ރަށުގެ ބަނދަރު ހެދުމުގެ މަސައްކަތް އަލުން ފެށިކަމާއި، އާ ފިހާރައެއް ހުޅުވިކަމާއި، އިތުރު ފިހާރައަކާއި ސައިހޮޓަލެއް ހުޅުވަން އުޅޭކަންވެސް އަޅުގަނޑަށް އެނގުނީ މިބްލޮގްގެ ޒަރީޔާއިންނެވެ. މިފަދަ މައުލޫމާތުތައް ކުރިމަގުގައިވެސް އެކިކަންކޮޅުތަކުގައި ދިރިއުޅެމުންދާ ލަންދޫގެ ރައްޔިތުންނާ ހަމައަށް މިބްލޮގްގެ ޒަރީޔާއިން ފޯރުވައިދޭނެކަމަށް އަޅުގަނޑު ޔަޤީންކުރަމެވެ. މިބްލޮގަށް ލިއުމުގެ ޝައުޤުވެރިކަން އަޅުގަނޑުގެ ހިތުގައި ވަރަށްބޮޑުކަމަށް ދަންނަވަމުން، އަޅުގަނޑުގެ ފުރަތަމަ ލިއުން ކުރުކޮށްލާނަމެވެ. މިމަސައްކަތް ކުރައްވާ ފަރާތްތަކަށް ކާމިޔާބީއަށް އެދެމެވެ. އިރާދަކުރެއްވިއްޔާ މިއީ ކުރިމަގުގައި ފުޅާވެގެންދާނެ، މުޅި ލަންދޫ ޝާމިލްވާނެ ކަމެއްކަމަށް އަޅުގަނޑު ޔަޤީންކުރަމެވެ. ލަންދުއަށް އަބަދުވެސް ކުރިއެރުމާއި ތަރައްޤީއަށް އެދެމެވެ.