ޚަބަރު: އަޙްމަދު ދާއޫދު

ލަންދޫކުރީގެ ކަތީބު އަލްފާޟިލް ޙަސަން ނަޞީރު އިބްރާޙީމް އާއި ލަންދޫއޮފީސް ހިންގުން ރަސްމީކޮށް ޙަވާލުކުރައްވައިފިކަމަށް ލަންދޫއިންފޯއަށް މަޢުލޫމާތު ލިބިއްޖެއެވެ. ލަންދޫކުޑަކަތީބު އަލްފާޟިލް ޢަބުދުއްނާާޞިރު ޢަލީ ލަންދޫއިންފޯއަށް މަޢުލޫމާތު ދެއްވަމުން ވިދާޅުވީ މިއަދު 12:40 ގައި އޮފީސްހިންގުން ރަސްމީގޮތުން ނަޞީރު އާއި ޙަވާލުކުރައްވައިފިކަމަށެވެ.
މިހާތަނާ ޖެހެންދެން ނަޞީރު ހުންނެވީ ނ.މާޅެންދޫ ކަތީބު ކަމުގެ މަޤާމްގައި މާޅެންދޫގައެވެ. ލަންދޫރައްޔިތުންގެ ތެރެއިން ގިނަޢަދަދެއްގެ ބަޔަކު ނަޞީރު އާއި ހިތްހަމަނުޖެހިގެން ސަރުކާރުގެ ކަމާބެހޭފަރާތްތަކުގައި ޝަކުވާކުރުމުން އޭނާ މާޅެންދޫއަށް ބަދަލުކުރެއްވީ މިދިޔައަހަރުގެ ތެރޭގައެވެ.
އަދި ހަމަ މިއަދު ގެ ވަގުތެއްގައި ނ.މާޅެންދޫއޮފީސް ހިންގުން ނ.މާފަރު ކުރީގެ ކަތީބު އަލްފާޟިލް އިބްރާހީމް މުޙައްމަދު އާއި ޙަވާލުކުރައްވައިފިކަމަށް ވެސް ލަންދޫއިންފޯއަށް މަޢުލޫމާތު ލިބިފައިވެއެވެ. އަލްފާޟިލް އިބްރާހީމް މުޙައްމަދު މިހާތަނަށް ހުންނެވީ ރާއްޖެތެރޭގެ ޚާއްޞައެހީތެރިޔާގެ މަޤާމްގައެވެ. މިބޭފުޅާވެސް މާފަރު ބޮޑުކަތީބު ކަމުގައި ވަރަށް ދިގުމުއްދަތެއްގައި ހުންނެވި ފަހުން ވަކިކުރައްވާ ފައިވަނީ މާފަރު ރައްޔިތުންގެ ތެރެއިން ގިނަޢަދަދެއްގެ ބަޔަކު އެބޭފުޅާ އާއި ހިތްހަމަނުޖެހިގެން ސަރުކާރުގެ ކަމާބެހޭ ފަރާތްތަކުގައި ޝަކުވާކޮށްގެންކަމަށް މާފަރުން ލަންދޫއިންފޯއަށް މަޢުލޫމާތު ދެއްވި ބޭފުޅަކު ވިދާޅުވިއެވެ.
ފަހަކަށް އައިސް މިފެންނަނީ ރައްޔިތުން ހިތްހަމަނުޖެހިގެން ކުރިން މަޤާމުން ދުރުކުރައްވާފައިވާ ބޭފުޅުން އަލުން މަޤާމްތަކަށް ހަމަޖައްސަވާތަނެވެ. އެގޮތުން މިއަތޮޅު މިލަދޫ، ވެލިދޫ، ގައިވެސް ކުރިންވެރިކަމުގައި ތިއްބަވާފާ މަޤާމުން ދުރުކުރެއްވި ބޭފުޅުންނަށް ވަޒީފާ އަލުން ދެއްވާފައިވަނީ ދާދިމިދާކަށް ދުވަހުގައި ކަމަށް މަޢުލޫމާތު ލިބިފައިވެއެވެ.ލަންދޫއިންފޯއިން ދެކޭގޮތުގައި ގޯސްވާނީކީ ވެރިކަންކުރާ މީހާއެއް ނޫނެވެ. ގޯސްވިއްޔާ ވާނީ އެމީހަކު ކުރާކަމެކެވެ. އެހެންކަމުން ކޮންމެބޭފުޅަކުވެސް އެބޭފުޅަކު ކުރައްވާ ކަންތައްކަކީ ރަނގަޅު އަދި މުޖްތަމަޢުގެ އެހެންއަފްރާދުންނަށް ވެސް ހަޖަމުކުރަން ފަސޭހަ ކަންތައްތަކަށް ހެއްދެވުމަށް އެންމެހައި ބޭފުޅުންނަށް ލަންދޫއިންފޯގެ ފަރާތުން އިލްތިމާސް ކުރަމެވެ.