ލިޔުނީ : މޫސާ ޙުސެއިން ( މިހާސް )ސ

Email: moosa.goma@yahoo.com

ޖެޓީގެ ކޮޅުގައި ހަދާފައިވާ ގެގަޑުވެއްޓި އެބައިގެ ޝީޓްތައްވެސް ވަނީ ބޮޑުބައެއް މޫދުތެރެއަށްވެއްޓި ، ބޮޑުބައެއްގައި ރެދު އަޅާފައެވެ.

( ފޮޓޯ : މޫސަ )

ޙަޤީގަތުގައި މިއަދު ލަންދޫ ލަންދޫގެ ގޮތުގައި ފާހަގަކުރެވިގެންދަނީ، ލަންދޫގެ މަލަމަތި ފެނުމުން ރަންވޭއެއްގެ ސިފާގައި ފެނިގެންދާ 400 ފޫޓް ދިގުމިނުގެ ޖެޓީއިންނެވެ.
ހަމައެކަނި އުދައްޔާއި، ފަކީރާ އަދި އުވަދޯނި ބޭނުންކޮށްގެން މިރަށުގެ ރައްޔިތުންގެ ގަދަ ހިތްވަރާއި ޖޯޝުން ހަދާފައިވާ ޖެޓީއަކީ މިއަދުމުޅި ލަންދޫގެ ފަހުރާއި ޝަރަފެވެ.
ޝައްކެއްނެތްގޮތުގައި ޒަމާނީ ވަސީލަތްތައް ބޭނުންނުކޮށް މިފަދަ ބުރަ މަސައްކަތެއް މިހާ ފުރިހަމައަށް ކުރެވޭނީ ވަރަށްގިނަ ބައެއްގެ ފުރިހަމަ ޤުރުބާނީއާއި އެކުގައެވެ. ޢަމަލީގޮތުން މިމަސައްކަތުގައި ބައިވެރިވެލުމުގެ ފުރުޞަތުލިބުނު މީހެއްގެ ހައިސިއްޔަތުން އަޅުގަނޑަށް ދެންނެވޭނީ ލަންދޫގެ ކުދި ބޮޑު އެންމެހައި ރައްޔިތުން ސާމިލްވާގޮތައް ކޮށްފައިވާ މި ޖެޓީގެ މަސައްކަތަކީ މުޅިއަތޮޅަށްވެސް ނަމޫނާ މަސައްކަތެއް ކަމުގައެވެ.
ލަންދޫގެ ކުދި ބޮޑު، އަންހެން ފިރިހެން، އެންމެންގެ ގަދަހިތްވަރާއި މިންނެތް މަސައްކަތުން ހަދާފައިވާ މިޖެޓީއަކީ ލަންދޫއަށް ދިމާވެފައިވާ ލަފާ ފުރުމުގެ ދަތިކަން ފިލުވާލުމުގެ މަޤްސަދުގައި ސަރުކާރާއި، ޔޫ.އެން.ޑީ.ޕީގެ ރަމްޒީ އެހީލިބިގެން ބޮޑުބައި ލަންދޫ ރައްޔިތުން ޚަރަދުކޮށްގެން ލަންދޫ ރައްޔިތުންގެ އެކުވެރިކަން ރަމްޒުކޮށް ދިނުމުގެ ގޮތުން ހަދާފައިވާ ޖެޓީއެކެވެ.
ނަމަވެސް ލަންދޫގެ ފަޙްރެއްކަމުގައި ބެލެވެމުންއަންނަ މިޖެޓީ މިއަދުމިވަނީ ވަރަށް ބޮޑަށް މަރާމާތުކުރަން ޖެހިފައެވެ. މިތަން ޖެޓީއެއްގެ ގޮތުގައި ބޭއްވެން އަންނަނީވެސް މިހިދުން މިހިދަށް މަރާމާތުގެ ވަރަށް ގިނަގުނަ މަސައްކަތްތަކެއް ކުރެވިގެންނެވެ.
އަޅުގަނޑުމެން ލަންދޫ އިންފޯގެ ފަރާތުން ލަންދޫގެ ރ.ކ.އ ކޮމެޓީއަށާއި، ރަށުގައިހުރި މިކަމުގައި އިސްވެ ހަރަކާތްތެރިވެލައްވަން ޖެހޭ މުއައްސަސާއަށް މިގޮވާލަނީ މިރަށު ރައްޔިތުންގެ އެކުވެރިކަމާއި، އެއްބައިވަންތަކަން ރަމްޒުކޮށްދޭ މިޖެޓީ މަރާމާތު ކުރުމުގައި ތިބޭފުޅުންނަށް އެޅުއަވެންހުރި ފިޔަވަޅުތައް ވީއެންމެ އަވަހަކަށް އަޅުއްވައި ދެއްވައި، ރައްޔިތުންނަށް މިކަމާއި ގުޅޭ ސާފް މަޢުލޫމާތު މިހިދުން މިހިދަށް ފޯރުކޮށް ދެއްވާށެވެ.