ލަންދޫ އިންފޯ ވެބްސައިޓަށް ޒިޔާރަތް ކޮށްލެއްވުމަށް
Wednesday, 26 November 2008
ތަންތަނުގެ އިސްވެރިންގެ ޝަކުވާތަކުގެ ޕެޓިޝަންތައް އިތުރުވަނީ
ލިޔުނީ : އަޙްމަދު ދާއޫދު
ސަރުކާރުގެ މުއައްސަސާ ތަކުގެ ( ޚާއްޞަކޮށް އަތޮޅުތެރޭގެ ސްކޫލްތަކުގެ ) ވެރިންންގެ ގޮތުގައި ވަރަށް ގިނަދުވަސްތަކެއްވަންދެން މެދުކެޑުމެއްނެތި ރައްޔިތުންނަށް ޚިދުމަތް ކުރަމުން މިއަދާ ހަމައަށްވެސް އެބޭފުޅުންގެ މަސައްކަތްތަކުގައި ދެގެޮތެއްވުމެއްނެތި މަސައްކަތް ކުރައްވަމުން ގެންދަވާ ބައެއްބޭފުޅުންގެ ޝަކުވާ ތަކުގެ ޕެޓިޝަންތައް ކަމާބެހޭ އިސްވުޒާރާ ތަކަށް މިދުވަސްކޮޅު ފުދޭވަރަކަށް ގިނައިން ހުށަހަޅަމުން ދާކަމުގެ މަޢުލޫމާތު އަޅުގަނޑުމެންނަށް ލިބެމުން އެބަދެއެވެ. މިގޮތުން އެންމެފަހުން ހުށަހެޅުނު ދެ ޕެޓިޝަނަކީ ނ.އަތޮޅު މަދަރުސާގެ އެސިސްޓެންޓް ހެޑްމާސްޓަރ އަލްފާޟިލް ސައްތާރު މުޙައްމަދު އާއި ބެހޭ ޕެޓީޝަނަކާއި ، ނ.މާފަރު ސްކޫލް ހިންގުމާއި ޙަވާލުވެހުރި އެސްކޫލްގެ ސްޕައިވަޒަރ އަލްފާޟިލް ޙަސަން އިބްރާހީމް އާއި ބެހޭ ގޮތުން މިނިސްޓްރީ އޮފް އެޑިޔުކޭޝަނަށް ހުށަހެޅިޕެޓިޝަނެވެ.
ބަޔާންވެ ދިޔަ ދެ ޕެޓިޝަނުގައިވެސް ޕެޓިޝަން ތައްޔާރު ކުރި ފަރާތުން މައިގަނޑުގޮތެއްގައި ފާހަގަކުރައްވާފައިވާ ޝަކުވާތަކަކީ އެބޭފުޅުންގެ ވަޒީފާއަށް ނުވަތަ ވަޒީފާގެ މަސްއޫލިއްޔަތު އަދާކުރުމަށް އެބޭފުޅުން ޤާބިލްނޫންކަމަށް ބުނެ ކޮށްފާ ވާ ޝަކުވާތަކެވެ. ސްކޫލް ކުދިންގެ ކިޔެވުމުގެ ފެންވަރު ދުވަހެއްދުވަހަކަށް ދައްވަމުންދާ ވާހަކައެވެ. ކުދިންގެ ސްލޫކާއި އަޚްލާޤު ގޯސްވަމުންދާ ވާހަކައެވެ. ދަރިވަރުންގެ ކިބައިގައި މައިންބަފައިންނަށް އިޙްތިރާމް ކުރުމުގެ ރިވެތި އަޚްލާޤު އާލާ ނުވާ ވާހަކައެވެ. ގްރޭޑް 10 އެއް ނިމިގެން ސްކޫލުން ނުކުންނައިރު އެންމެ ދަށްމިނުން ޤުރުއާން ބަލައިގެން ފުރިހަމައަށް ކިޔަންނޭންގޭ ވާހަކައެވެ.
އެހެންކަމުން މިތާންގައި އަޅުގަނޑުހިތުގައި އުފެދޭސުވާލަކީ މިފަދަ ޕެޓިޝަންތަކުގައި މިލިޔެވޭ ޝަކުވާތަކުގެ ހުރިހާ ޒިންމާ އެއް ހަމަ ނަންގަވަން ޖެހޭނީ އެސްކޫލެއް ހިންގަވަން ހުންނަވާ ނުވަތަ އެސްކޫލެއްގައި އިސްކޮށް އުޅުއްވާ ބޭފުޅުން ބާވައެވެ. ނުވަތަ ދަރިވަރުންބާވައެވެ. ނުވަތަ އެ ކުދިންގެ ބެލެނިވެރިންބާވައެވެ. ނުވަތަ އެސްކޫލްގެ ޓީޗަރުން ބާވައެވެ. ޖަވާބު އަންނާނީ އެކިދިމާއިން އެކި ގޮތަކަށް ޔަޤީނެވެ. އެކިމީހުން ޒިންމާ އަޅުވާނީ އެކި ފަރާތުގެ ބޮލުގައެވެ. ބައެއްމީހުންބުނާނީ މިހުރިހާ ކަމެއްގެ ޒިންމާ ނަގަންޖެހޭނީ ދަރިވަރުންގެ ބެލެނިވެރިން ކަމުގައެވެ.
އެހެންވީމާ ވަޒީފާއަށް ޤާބިލް މީހަކީ ކޮބައިކަން ޕެޓިޝަން ހުށަހަޅާ ފަރާތްތަކަށް މިއަދު މިވަނީ އޮޅިފައިކަން ޔަޤީނެވެ. މިހުރިހާކަމެއް ސަތޭކަ ޕަސަންޓް ހައްލުވެފައިއޮތީ ރާއްޖޭގެ ކޮންސްކޫލެއްގައި ބާވައެވެ. އަތޮޅުމަސަރުސާގެ ހިންގުމުގެ ދާއިރާގައި ތިއްބެވި ބޭފުޅުންގެ ނާޤާބިލްކަމުން ފަހަރެއްގައި އެމަދުރަސާގެ ކުދިންގެ ފެންވަރު ދައްވެ އަޚްލާޤު ގޯސްވެގެން ހިގައިދާނެއެވެ. އަދި ހަމަ އެފަދައިން ނ.މާފަރު ސްކޫލްގެ ހިންގުމާއި މިވަގުތު ޙަވާލުހުންނެވި ބޭފުޅާގެ ތަޢުލީމީ ފެންވަރު ދައްވުމުގެ ސަބަބުން މާފަރު ސްކޫލްގެ ކުދިންގެ އަޚްލާޤުގޯސްވެ ދަރިވަރުންގެ ފެންވަރު ދަށްވެދާނެއެވެ. ނަމަވެސް ދިވެހިރާޖޭގައި 200 އަށް ވުރެ ގިނަސްކޫލް ހުރިއިރު ހަމަ ކޮންމެ ސްކޫލެއްގައިވެސް ކުރިން ބަޔާންވެ ދިޔަބާވަތުގެ މައްސަލަތައް ފެންމަތިވަމުން ދުވަހެއްދުވަހަކަށް އިތުވެގެން އެދަނީ އެސްކޫލްތަކުގައިވެސް ނާޤާބިލް މީހުން ތިބީމާ ބާވައެވެ.
ނޫނެކެވެ. އެހެނެއްނޫނެވެ. ތަންކޮޅެއް ދުރަށް ފުންކޮސް ވިސްނާލާށެވެ. ކަންކަން ހައްލުކުރެވޭނެ ހަމައެކަނީ ގޮތަކީ އިޚްލާޞްތެރިކަމާއިއެކު މިއަދާހަމައަށް އެމަސައްކަތް ކޮށްދެއްވި ބޭފުޅުން މަޤާމުން ދުރުކޮށް އައު ބޭފުޅުން މަޤާމްތަކަށް އިސްކޮށްގެންނެއްނޫނެވެ. ހަމައެކަނި އޮތްހައްލަކީ އެއީކީ ނޫނެވެ. ހައްލަކީ ހަަމަ ކޮންމެ މީހަކުވެސް އެމީހެއްގެ ޒިންމާ ފުރިހަމަގޮތުގައި އަދާކުރުމެވެ. ބެލެނިވެރިންވެސް ، ޓީޗަރުންވެސް ، ދަރިވަރުންވެސް އަދި އިސްވެރިންވެސް އެމީހެއްގެ ޒިންމާ އެމީހަކު ފުރިހަމައަށް އަދާކުރައްވާށެވެ. އޭރުން ޕެޓިޝަންތަކެއް ހުށަނޭޅިއަސް ވަޠަންގެ ދޫ އެގޮވާ ގޮވުންތައް ޙާޞިލްވެދާނެއެވެ.
ޝާއިޢުކުރެވުނީ ރިޕޯޓް
Subscribe to:
Post Comments (Atom)
0 ޚިޔާލު:
Post a Comment