ލިޔުނީ : އަޙްމަދު ދާއޫދު

ޑީއާރުޕީގެ ޒަޢީމް އަލްއުސްތާޛު މަޢުމޫން ޢަބުދުލްޤައްޔޫމް ރިޔާސީ ކެމްޕޭން ދަތުރުފުޅުގައި ނ.އަތޮޅަށް ކުރެއްވި ދަތުރުފުޅުގައި މަނަދުއަށް ވަޑައިގަތުމުން އެމަނިކުފާނާ ބައްދަލުކުރުމަށްޓަކައި ލަންދޫގެ ވަފުދެއް މަނަދުއަށް ދިޔަކަމުގެ މަޢުލޫމާތު ލަންދޫއިންފޯއަށް ލިބިއްޖެއެވެ.
ރަށުގެ ކަމުވޮށިވެގެންވާ މީހުންގެ ތެރެއިން ދެތިންމީހާކާއި ޒުވާނުންގެ ތެރެއިން ހައެއްކަ ކުދިން ހިމަނައިގެން އެކުލަވާލި މިވަފުދުގެ އެންމެމުހިއްމު ބޭނުމެއްކަމުގައި ލަންދޫއިންފޯއަށް އެނގިފައިވަނީ ލަންދޫގެ ފަޅުބޮޑުކުރުމަށް އެދި އެމަނިކުފާނުގެ އަރިހުގައި ދެންނެވުމާއި ރަގަނޅުފެންވަރެއްގެ ފުޓްބޯޅަދަނޑެއް ލަންދޫގައި ހަދައި ދެއްވާތޯ ދެންނެވުމެވެ.
ވަފުދުގެ ބޭފުޅަކާ ލަންދޫއިންފޯގެ ފަރާތުން ސުވާލުކޮށްލުމުން ބުނުއްވީ ދަތުރު ކާމިޔާބު ކަމަށެވެ. ލަންދޫ ފަޅުބޮޑުކުރުމަށް އެދިފައި ވާކަން ޒައީމަށް އެނގިވަޑައި ނުގަންނަވާ ކަމާއި، އެމަނިކުފާނަށް ސިޓީއަކުން އެވާހަކަ ދެންނެވުމުން އެކަމަށް ހައްލެއް ލިބޭނެކަމުގެ ވަރަށްބޮޑުއުންމީދެއް އެބައޮތްކަމަށް އެބޭފުޅާ ވިދާޅުވިއެވެ. އަދި ދަނޑެއްގެ މައްސަލަވެސް ހައްލުވެގެން ދިޔުމަކީ ވަރަށް ކައިރީގައިވާ ކަމެއްކަމަށް މިވަފުދުން ހާމަކުރެއެވެ.އަތޮޅުގެ އެހެންބައެއްރަށްރަށުންވެސް މިފަދަ ވަފުދުތައް އެމަނިކުފާނާއި ބައްދަލުކުރުމަށް ދިޔަކަމަށްވެއެވެ.